'blʋa ‑wee'‑ 'bɛɛ‑ Kea 'a 'nynɩ "i
96
Ao ble 'dʋ dee ao 'je Tʋ "bo 'da;ao nyʋ "klein ‑nɩa 'de 'blʋa 'di ɛ,
ao ble ao 'je Tʋ "bo 'da.
2 Ao ble ao 'bɛɛ‑ Tʋ "bo 'a 'nynɩ "i.
'De 'wɩ 'oo 'wɩ ‑wee'‑ "klein 'di ɛ,
ao 'tmʋ ɛɛ' nyʋ 'pʋʋtɩ‑.
3 Ao jrɛɛ' ɛɛ' 'beɔdɛ 'ɛ ‑tɩ' 'de 'blʋa ‑wee'‑ "kpei.
Ao 'tmʋ dɩ 'dɔe ɛ nʋa, de 'blʋa ‑wee'‑ "klein ‑pee.
4 Dɛ ‑nʋɛ ɛmɛ ‑nɩ Tʋ "bo "bɛi,
ɛ nɩɛ 'nynɩ ‑sa ‑ka:
‑Wɛe ɛ kmai" ‑ɛ ‑sii ‑kɩɩ'‑ ‑wee'‑.
5 Dɛ ‑nʋɛ ɛmɛ ‑nɩ, ‑kɩɩ'‑ ‑nɩa 'de 'blʋa ‑nɛ
"kpei se dɛjrɛ' nɩ‑,
'de ‑mɛ Tʋ "bo mɛ ‑nʋ' jaʋn.
6 Dɛwɔnɩa' ke "jri 'wlʋa mɩ ‑nɩ 'de ɛ 'ʋn,
‑wɛe "ikmaa' ke, "jrii nmɔa' ke‑,
ɩmɩ ‑ji" 'de ɛɛ' ‑gbu" 'di.
7 Aomɔ 'blʋa ‑wee'‑ "klein,
ao 'bɛɛ‑ Tʋ "bo 'a 'nynɩ "i,
ao 'tmʋ ɛɛ' 'beɔdɛ ke ɛɛ' "ikmatɩ‑.
8 Ao ji ‑a ‑je Tʋ "bo 'nynɩ ‑sa,
ao ja aoa' ‑paan'‑ 'de ɛɛ' ‑gbu" 'di,
9 ‑wɛe 'de 'mʋʋa‑ 'de, ao 'je "jru ja jaa,
ao ‑gbɛɛ'‑ Tʋ "bo "juɛi,
ɛɛ' i ‑kwea' poɛ "jri "kpae.
Ao nyʋ "klein ‑nɩa 'de 'blʋa "kpei ɛ,
ɛɛ' faʋn nɩ 'de aopʋ‑ 'ʋn.
10 Ao 'tmʋɛ 'de 'blʋa ‑wee'‑ ‑pee,
ka Tʋ "bo nɩa Tʋ "bo ɛ:
'blʋa kuɛ 'e 'dei ɛɛ' ‑suua' i,
Kea a 'wlʋɛ 'blʋa ‑wee'‑ 'a 'pee 'de "isrɛa' 'ʋn.
11 Jaʋn nʋ 'mʋa‑,
'blʋa ‑wee'‑ ‑pliin" "jɛi wei,
'tɔniɛ ke dɩ ‑nɩa 'de ɛ wɔn ‑wee'‑ klu.
12 'Kwla ke, dɩ ‑nɩa 'de ɛ ‑sɔn i,
‑wee'‑ nʋ 'mʋa‑!
‑Wɛe ti "klein ‑nɩa 'de 'kwlɩ 'dii,
'a 'mʋa‑ nʋ ‑cnuɛn" 'je 'kpa,
13 'de Tʋ "bo "juɛi, dɛ ‑nʋɛ ɛɛ ji',
ɛɛ ji' ‑wɛe ɛ 'je 'blʋa 'a 'pee 'je.
Ɛɛ muɛ 'blʋa 'a 'pee 'jea' 'de "isrɛa 'ʋn,
ɛɛ muɛ nyʋ 'a 'pee 'jea,
'de ɛɛ' tɔ' ‑tɩ 'tmʋa 'ʋn.